Днепр мен Есіл егіздей болған екі күн

Ойда жоқта редакцияға Қазақстан жастар альянсынан Украина мен Қазақстанның жас журналистерінің форумына қатысуға шақырту келіп, дүйсенбіде газеттің жұмысынан бір аптаға болса да құтылғаныма қуанып, “Қайдасың, байтағым!” деп тартып отырғам. Астанаға таңда жетіп, асыққанның кесіренен қас қылғанда пойызда шұлғауымды ұмытып кетіппін. Астанадағы досым-Жанар екеуміз ебіл-себіл боп мәгәзіннен шұлғау іздеп, зорға таптық қой. Сөйтіп “Rixos Prezident  Hotel Astana” қонақ үйінде өткен  (Астанадағы қонақ үйлер де, мейрамханалар да көбіне ағылшынша аталады екен, өкініштісі) салтанатты ашылуға үлгеріп, Украинадан келген әріптестерімізбен суретке түстік. (суретте солдан оңға қарай: 1.Микола Явченко -Украинаның жанұя, жастар және спорт жөніндегі министрлігінің баспасөз хатшысы. 2.  Олег Ахметов – “Астана” телеарнасының журналисі. 3. Наталья Жуковская - ”УТР” телеарнасының журналисі. 6.Валерий  Джигун – Қазақстандағы Украинаның уақытша сенімді өкілі. 7. Мен)  

 Салтанатты ашылудан кейін дөңгелек үстелдің  басына отырып, бәріміз “Украина мен Қазақстан арасында жастар саясатын тізе қосып жүргізу, тәжірибе алмасу, журналистерді байланыстырып, ақпарат алмасуда не істей аламыз?” деген тақырыпта қызу талқылау жасадық. Олег Ахметов екеуміздің “Ортақ ақпараттық интернет портал құрайық” деген ұсынысымыз бірауыздан қабылданды. Ең қызығы, айтылмыш порталда жиі қолданатын ортақ сөздерден тізбеленген украинша-қазақша сөздік болатын болды.   Ал жас журналистерді бір-бірімізге жіберіп, оқыту мәселесі техникалық мүмкіндіктердің төммендігінен әзірше екіұштылау болып қалды. Техникалық мүмкіндік демекші, біздің телеарналарымыздың техникалық мүмкіндігі Украинаның орталық телеарналарына қарағанда әлдеқайда жетілген болып шықты. Оны Астанадағы “Хабар” мен “Қазақстан” телеарнларын аралағанда украиндықтар өздері мойындады.

Екінші күні “Жастар телеарнасы: ол қандай форматта және қай бағытта болғанын қалайсыздар?” деген сұрақ ортаға тасталды. Әркім өзінің ұсыныстарын айтты. Журналистер жиналған жер сол ғой! Жамырасып, тұс-тұстан көкейімізге тірелгенді айтып қалып жаттық. Жалпы алғанда мындай ұсыныстардың іске асқанын құп көрдік:

1. Жастар телеарнасы әлдебір саяси топтарды, саяси науқанды насихаттаушы қолжаулық емес, нағыз жастарды тәрбиелейтіндей сипатта болуы керек.

2. БАҚ туралы заңдағы “Телеарналардағы қазақша хабарлар 50 пайыздан кем болмау керек” деген талаптың өңін айналдырып, ”50х50″ деп бұрмалап, қазақша хабарларды прайм-тайм, дүбәрә дубляж есебінен толтырып жүрген осы күнгі телеарналардың қателігін қайталауға жол бермеу керек.

3.  Спорттық хабарлар, оның ішінде ұлттық спорт түрлерін трансляциялау көбірек орын алсын. Ол тұрғыда украиндықтардан үйренеріміз бар. Бір екі жылдан бері оларда таза украин тілінде коментарий жасайтын спорттық телеарна ашылды.

4. Интелектуалдық хабарлар көбірек болсын.

5.  Отандық мультфильмдер мен отандық режиссерлар түсірілген кинолар міндетті түрде ккөрсетілсін!

6. Жастарды патриоттыққа, махабатты, достықты, ерлікті дәріптеуге үйрететін сериалдар түсірілсін.

7. Қызылкеңірдек айтысуға құрылған хабарлар азайтылсын. Себебі оның бәрі -  “Төлегеннің алты қазға арзуы”

8. Жастар ұйымдарының жұмысын көрсету осы телеарнада ұйымдастырылсын.  және тағы да басқа ұсыныстар.

P.S: Бір қуанарлығы “Еларна” телеарнасы қыркүйектен бастап Жастар телеарнасы ретінде көрерменге жол тартады. Осы ісімағзам тірліктің бастауында құлшынысы құрық тастатпас асау жастардың тұрғаны, әрине, құптарлық іс. Сондықтан өз идеяларыңды, бәлки, болашақ телебағдарламалар жобасы туралы бізбен де бөлісіп,  Білім және ғылым министрлігіне, мына адреске жіберсеңіз де болады:d_rashid@edu.gov.kz